حتي لو سوابق يا حواضر 

نشرت الاهرام في صفحة الحوادث موضوع لا تعرف ان كان خبر ولا مقالة ولا ايه لأنه كمان مش عليه اسم اللي كتبه علشان كنت رفعت عليه أول قضية في حياتي وشردته هو وعياله

المكتوب ملخصه انه فيلم وراء الشمس الذي انتجته واذاعته قناة الجزيرة – اليوم محاكمة صاحبة الفيلم-  فيلم متفبرك من قناة تسعي لتشويه سمعة مصر – لحد دلوقتي كلام صح فيما يخص القناة – لكن فجأة تقول الجريدة العجيبة انه المعذبين في أقسام الشرطة المصرية "سوابق" وكأن السوابق ده مش انسان ومش ليه حقوق وتلاقي بقي كلام غريب عن انهم قبضوا فلوس عشلان يتكلموا عن مصر ويخلوا صورتها وحشة

هو من أمتي صورتنا كانت حلوة الا في عيون الحكومة والسياح بتوع المتحف المصري (ومش كلهم كمان)؟؟؟!!!!!

مصر فيها تعذيب والمواطن اللي ملوش ظهر بيضربوه علي بطنه وفي مناطق أخري زي عماد الكبير

انا اشهد انه التعذيب في مصر مش ممنهج (ودي وجهة نظري) لكنه ثقافة وكل واحد فينا في أيدة سلطة بيعذب الناس التانيين بأي شكل وليس بالضرورة علي طريقة ضباط الشرطة.

سوابق او مش سوابق المفروض انه لا يتعرض للتعذيب وانه له كرامة وانسانية

ولو الداخلية الرشيدة واثقة من نفسها مش كانت منعت دخول الموبايلات الاقسام زي ما حصل دلوقتي

لكن لاني اشك في ذكاء القائمين علي أمور الامن العام في مصر (وليا معاهم حكاوي) هما نسيوا ان اللي تم تصويره ده كله بمعرفة الظباط أنفسهم

هقول ايه بس احنا وراهم ويا يحترموا الناس يا يحترموا الناس مفيش حلول بديلة.

تحياتي

محمود ابراهيم